സെപ്‌റ്റോ ഐപിഒ സെറ്റ്, സെബിയുടെ അനുമതി ലഭിച്ചു

ഇന്ത്യയിലെ ഓഹരി വിപണി നിയന്ത്രിക്കുന്ന സെബി, ഭക്ഷണ വിതരണ ആപ്പായ സെപ്‌റ്റോയുടെ ഐപിഒയ്ക്ക് പ്രാഥമിക അനുമതി നൽകി. അതായത്, കമ്പനിക്ക് ഇനി പൊതുജനങ്ങളിൽ നിന്ന് നിക്ഷേപം സ്വീകരിച്ച് ഓഹരി വിപണിയിൽ ലിസ്റ്റ് ചെയ്യാം.

കോൺഫിഡൻഷ്യൽ ഫയലിംഗ്

ഏകദേശം 11,000 കോടി രൂപ വിപണിയിൽ നിന്ന് സമാഹരിക്കാനാണ് കമ്പനി ലക്ഷ്യമിടുന്നത്. 2025 ഡിസംബറിൽ തന്നെ സെപ്‌റ്റോ ഇതിനായുള്ള രേഖകൾ സെബിക്ക് സമർപ്പിച്ചിരുന്നു. പൊതുജനങ്ങൾക്ക് കാണാൻ കഴിയാത്ത കോൺഫിഡൻഷ്യൽ ഫയലിംഗ് രീതിയായിരുന്നു അത്.

മെയ് മാസത്തെ ആദ്യ വാരത്തിൽ കമ്പനി തങ്ങളുടെ സാമ്പത്തിക വിവരങ്ങൾ പുതുക്കി ഒരിക്കൽ കൂടി അപേക്ഷ സമർപ്പിക്കും. നിക്ഷേപകർക്ക് ഈ ഓഹരിയിൽ എത്രത്തോളം താല്പര്യമുണ്ട് എന്ന് പരിശോധിക്കുന്ന പ്രക്രിയ അടുത്ത രണ്ടാഴ്ചയ്ക്കുള്ളിൽ പൂർത്തിയാകും.

എല്ലാം പ്ലാൻ ചെയ്തതുപോലെ നടന്നാൽ ജൂൺ അവസാനത്തോടെ സെപ്‌റ്റോ ഓഹരി വിപണിയിൽ ലിസ്റ്റ് ചെയ്യപ്പെടും. കമ്പനി ആരംഭിച്ച് ആറ് വർഷത്തിനുള്ളിൽ തന്നെ ഐപിഒ നടത്തുന്നു എന്നതാണ് ഇതിന്റെ പ്രത്യേകത. മാമ എർത്ത്, ഓല ഇലക്ട്രിക് തുടങ്ങിയ പ്രമുഖ കമ്പനികൾ ലിസ്റ്റ് ചെയ്യാൻ എടുത്തതിനേക്കാൾ കുറഞ്ഞ സമയമാണിത്. നിലവിൽ ഓഹരി വിപണിയിൽ ചില പ്രതിസന്ധികൾ നിലനിൽക്കുന്നുണ്ട്. പശ്ചിമേഷ്യയിലെ പ്രശ്നങ്ങൾ കാരണം വിപണിയിൽ വലിയ മാറ്റങ്ങൾ സംഭവിക്കുന്നുണ്ട്. വിപണിയിലെ ഈ അസ്ഥിരത കാരണം ഫോൺപേ തങ്ങളുടെ ഐപിഒ താൽക്കാലികമായി മാറ്റിവെക്കുകയും അവരുടെ മൂല്യം കുറയ്ക്കുകയും ചെയ്തിരുന്നു.

സെപ്‌റ്റോയുടെ ലക്ഷ്യം

ഫോൺപേയിൽ നിന്നും വ്യത്യസ്തമായി, സെപ്‌റ്റോ പ്രധാനമായും ലക്ഷ്യമിടുന്നത് പുതിയ മൂലധനം സമാഹരിക്കാനാണ്. അതായത് കമ്പനിയുടെ വളർച്ചയ്ക്കായി പുതിയ പണം കണ്ടെത്തുക എന്നതാണ് ലക്ഷ്യം. മത്സരരംഗത്തുള്ള മറ്റ് കമ്പനികളുമായി താരതമ്യം ചെയ്യുമ്പോൾ സെപ്‌റ്റോയുടെ പക്കൽ കുറഞ്ഞ തുകയാണുള്ളത്.

ബ്ലിങ്കിറ്റ്, സ്വിഗ്ഗി തുടങ്ങിയ വമ്പൻമാരോട് മത്സരിക്കാൻ കൂടുതൽ കരുത്ത് നേടുക എന്ന ലക്ഷ്യത്തോടെയാണ് സെപ്‌റ്റോ ഈ ഐപിഒയുമായി മുന്നോട്ട് പോകുന്നത്.നിങ്ങൾ 10 മിനിറ്റിനുള്ളിൽ സാധനങ്ങൾ ഡെലിവറി ചെയ്യുന്ന സെപ്‌റ്റോ എന്ന കമ്പനി ഇനി വെറുമൊരു സ്വകാര്യ കമ്പനിയല്ല, മറിച്ച് ആർക്കും ഓഹരികൾ വാങ്ങാൻ സാധിക്കുന്ന ഒരു പബ്ലിക് ലിസ്റ്റഡ് കമ്പനിയായി മാറാൻ പോകുകയാണ്. ഇതിനായുള്ള നിയമപരമായ അനുമതികൾ അവർക്ക് ലഭിച്ചുകഴിഞ്ഞു. വരും മാസങ്ങളിൽ നമുക്ക് സെപ്‌റ്റോയുടെ ഓഹരികൾ വാങ്ങാൻ സാധിക്കും.

Content Highlight : Zepto is getting ready for IPO